Muqdisho (Dawan) – Wasaaradda Qoyska iyo Horumarinta Xuquuqul Insaanka ee Dowladda Federaalka Soomaaliya ayaa Sabtidii ugu baaqday xisbiyada siyaasadeed ee ka qaybgalay doorashooyinka Galmudug inay xaqiijiyaan in ugu yaraan 30% musharraxiintooda ay yihiin haween, iyadoo sheegtay in qoondadani ay tahay xuquuq dastuuri ah iyo ballanqaad qaran oo muddo dheer jiray.
Baaqa ayaa lagu sheegay war ay wasaaraddu ku baahisay baraha bulshada ee rasmiga ah, iyadoo Wasiirka Qoyska iyo Horumarinta Xuquuqul Insaanka, Khadiija Maxamed Al-Makhzoumi, ay ku sheegtay in ka qaybgalka haweenka ee siyaasadda iyo go'aan qaadashadu uu yahay xuquuq dastuuri ah iyo masuuliyad qaran.
Wasaaraddu waxay ugu baaqday dhammaan xisbiyada ka qaybgalaya doorashooyinka golayaasha deegaanka iyo Golaha Wakiillada Galmudug inay u hoggaansamaan qoondada ugu yar ee 30% haweenka marka ay soo xulayaan musharraxiintooda. Sidoo kale waxay ugu baaqday guddiyada doorashooyinka Soomaaliya inay si dhow ula socdaan hirgelinta qoondadan inta uu socdo geeddi-socodka doorashada.
