Baydhabo (Dawan) – Xoghayaha guud ee Xisbiga Cadaaladda iyo Wadajirka (JSP), Xuseen Sheekh Maxamuud, ayaa farriin u diray shacabka Koonfur Galbeed, isagoo ugu baaqay inay si weyn uga qeyb qaataan doorashada berri, isla markaana codkooda siiyaan xisbiga JSP.
Xuseen Sheekh Maxamuud ayaa sheegay in doorashadu ay tahay maalin taariikhi ah oo shacabka Koonfur Galbeed ay codkooda ku dooranayaan hoggaamiyeyaasha iyo wakiillada ay doonayaan.
“Berri waa maalin taariikhi ah, waa maalin dadweynaha Koonfur Galbeed cod iyo ficil ku baxayaan,” ayuu yiri Xoghayaha guud ee JSP.
Wuxuu sheegay in codbixintu ay ka dhaceyso degmooyin kala duwan, isla markaana shacabka loo baahan yahay inay ka faa’iideystaan fursadda ay ku dooranayaan wakiilladooda heer deegaan iyo heer dowlad goboleed.