Jabuuti (Dawan) – Madaxweynaha Jamhuuriyadda Jabuuti, Ismaaciil Cumar Geelle, ayaa magacaabay xubno cusub oo ka mid noqday xukuumadda, kaddib isku-shaandheyn lagu sameeyay Golaha Wasiirrada dalkaas. Xubnahan cusub ayaa loo dhiibay wasaarado iyo xilal muhiim ah oo saameyn ku leh adeegyada bulshada, dhaqaalaha, dhalinyarada, dhaqanka iyo maamulka deegaanka.
Hana Farah Assoweh, oo loo magacaabay Wasiirka Haweenka iyo Arrimaha Qoyska, ayaa ah mas’uul sare oo khibrad u leh ilaalinta bulshada, maamulka hay’adaha iyo horumarinta adeegyada dadweynaha. Waxay sanadkii 2007 ka mid noqotay Guddiga Maamulka ee Shirkadda Korontada Jabuuti (EDD), ka hor inta aan sanadkii 2014 loo magacaabin Agaasimaha Guud ee Sanduuqa Qaranka ee Badbaadada Bulshada (CNSS). Sanadkii 2017, waxay noqotay La-taliyaha Farsamada ee Wasaaradda Shaqada, iyadoo ka shaqeysay arrimaha sharciga bulshada, shaqada iyo maamulka hay’adaha. Xilkeeda cusub ayaa diiradda saaraya ilaalinta qoyska, awood-siinta haweenka iyo xoojinta isku-duubnida bulshada ee Jabuuti.
Orbis Helaf Orbis, oo loo magacaabay Wasiirka Ganacsiga iyo Dalxiiska, ayaa ah diblomaasi khibrad dheer u leh xiriirka caalamiga ah, iskaashiga dhinacyada badan iyo diblomaasiyadda dhaqaalaha. Wuxuu ku biiray Wasaaradda Arrimaha Dibadda ee Jabuuti sanadkii 2000, isagoo ka shaqeeyay Waaxda Arrimaha Dhinacyada Badan. Sanadkii 2006, waxaa loo diray Safaaradda Jabuuti ee Japan, halkaas oo uu ka noqday La-taliye diblomaasiyadeed, ka hor inta aan sanadkii 2010 loo dallacsiin La-taliyaha Koowaad. Sanadkii 2018, waxaa loo magacaabay Agaasime-ku-xigeenka Waaxda Iskaashiga Caalamiga ah. Magacaabistiisa ayaa loo arkaa mid xoojin karta doorka Jabuuti ee ganacsiga, dalxiiska iyo iskaashiga dhaqaalaha gobolka.
Fardowsa Muuse Cige, oo loo magacaabay Wasiirka Dhallinyarada iyo Dhaqanka, ayaa ah hoggaamiye ka soo shaqeysay waxbarashada, isboortiga iyo horumarinta dhaqanka. Waxay shaqadeeda ka bilowday macallinnimada jimicsiga iyo isboortiga (EPS), iyadoo ka shaqeysay dugsiyada Gabode Lycée iyo Industrial and Commercial Lycée ee Jabuuti. Waxay sidoo kale heerk waxbarashada ka heysataa shahaado Master ah oo ku saabsan maamulka iyo abaabulka isboortiga. Fardoussa waxay soo hoggaamisay Xiriirka Qaranka ee Taekwondo-ga Jabuuti, waxayna soo noqotay Guddoomiye-ku-xigeenka Koowaad ee Guddiga Qaranka ee Olombikada iyo Isboortiga Jabuuti (CNOSD). Heer qaaradeed, waxay ka mid noqotay Guddiga Fulinta ee ACNOA, ka hor inta aan loo dooran Madaxweyne-ku-xigeenka ururkaas. Sidoo kale, waxay door muuqda kasoo qaadatay farshaxanka iyo dhaqanka, iyadoo ka shaqeysay tiyaatarka iyo filimada.
