Baydhabo (Dawan) – Aadan Maxamed Nuur (Aadan Madoobe) ayaa maanta si rasmi ah loogu caleema saaray xilka Hoggaamiyaha Dowlad Goboleedka Koonfur Galbeed, 26 maalmood kadib markii loo doortay hoggaanka maamulka.
Munaasabadda caleema-saarka oo ka dhacday magaalada Baydhabo ayaa waxaa ka qeyb galay Madaxweynaha Jamhuuriyadda Federaalka Soomaaliya, Xasan Sheekh Maxamuud, Ra’iisul Wasaaraha Xukuumadda Federaalka Soomaaliya,Xubo ka tirsan Golaha Wasiirrada iyo Baarlamaanka, madaxda Dowlad Goboleedyada Hirshabeelle, Waqooyi Bari iyo maamulka Gobolka Banaadir, iyo marti sharaf kale.
Khudbad uu ka jeediyay munaasabadda, ayuu Aadan Madoobe ku sheegay in mudnaanta koowaad ee uu siin doono horumarinta adeegyada bulshada, xoojinta amniga iyo dardargelinta mashaariicda horumarineed ee deegaannada Koonfur Galbeed.
Dhankiisa, Madaxweyne Xasan Sheekh Maxamuud ayaa sheegay in hoggaanka cusub uu ku yimid hannaan doorasho, isagoo tilmaamay in taasi ay ka duwan tahay habkii uu xilka ku yimid hoggaankii ka horreeyay.
