Soomaaliya, 20 Oktoobar 2025 — Golaha Shacabka ee Baarlamaanka Federaalka Soomaaliya ayaa si rasmi ah u ansixiyay Heshiiska Aagga Ganacsiga Xorta ah ee Qaaradda Afrika (AfCFTA), taas oo Soomaaliya u oggolaanaysa inay si buuxda uga mid noqoto suuq wadaagga ganacsi ee qaaradda Afrika.
Heshiiska ayaa maanta lagu ansixiyay kulanka Golaha Shacabka, kaas oo uu guddoominayay Guddoomiyaha Baarlamaanka, Aadan Maxamed Nuur (Madoobe).Heshiiska ayaa helay 145 cod oo oggol iyo hal cod oo diidmo ah, iyadoo cidna aysan ka aamusiin, sida uu sheegay guddoomiyaha Golaha.
Heshiiska AfCFTA ayaa ujeeddadiisu tahay in la abuuro suuq mideysan oo badeecooyinka iyo adeegyada ah, kaas oo kor u qaadaya ganacsiga, maal-gashiga, hal-abuurka, iyo isu socodka dadka ee wadamada Afrika.
Wasaaradda Ganacsiga iyo Warshadaha, oo soo gudbisay heshiiska, ayaa sheegtay in Soomaaliya ay ka heli doonto suuq ballaaran oo ka badan 1.4 bilyan oo qof, iyo fursado lagu dhisi doono hay’ado ganacsi iyo maalgashi oo horay dalka uga maqnaa.
“Heshiiskani muhiimad gaar ah ayuu noo leeyahay,” ayuu yiri Cabdirisaaq Xasan Yuusuf, Agaasimaha Waaxda Ganacsiga ee Wasaaradda Ganacsiga. “Wuxuu naga caawin doonaa fahamka ganacsiga xuduudaha ka gudba, wuxuu dhiirrigelin doonaa maalgashi cusub, sidoo kalena wuxuu horseedi doonaa dhismaha hay’ado aan hore u jirin.”
Qodobka 6-aad ee heshiiska AfCFTA ayaa qeexaya in uu diiradda saarayo ganacsiga badeecooyinka, adeegyada, maal-gashiga, xuquuqda hantida maskaxda, iyo siyaasadda tartanka ganacsiga. Qodobka 9-aad ayaa sidoo kale dhigaya in dalalka xubnaha ka ah aysan dulsaar ku sameyn karin badeecooyinka ay iska dhoofinayaan, halka sidoo kale ay waajib ku tahay in badeecooyinka la dhoofiyo aysan ka yareyn qiimaha suuqyada gudaha marka laga jaro canshuuraha.
Ansixinta maanta ayaa ka dhigan in Soomaaliya ay si buuxda uga mid noqotay 50 dal oo Afrika ah oo hore u saxiixay oo u ansixiyay heshiiska AfCFTA, iyadoo weli 6 dal oo ay kamid yihiin Suudaan, Koonfurta Suudaan, Liibiya, Benin, Madagascar, iyo Liberia aanay weli dhameystirin ansixintooda.
Qodobka 27-aad ee heshiiska ayaa tilmaamaya in dal kasta oo doonaya inuu ka baxo heshiiska uu sameyn karo kadib muddo shan sano ah marka uu heshiiska si rasmi ah u dhaqan galo.
Heshiiska AfCFTA, oo la aas-aasay sanadkii 2018, ayaa lagu tilmaamaa mid ka mid ah mashaariicda ugu ballaaran ee mideynta dhaqaale ee Afrika, kaas oo lagu doonayo in lagu kordhiyo ganacsiga gudaha Afrika, lagu horumariyo warshadaha, lana xoojiyo isku-xirka dhaqaale ee dalalka qaaradda.