Bangiga Afrika oo $76.37 milyan ku taageeray waddooyinka Soomaaliya

Muqdisho, 14 Decembar 2025 (Dawan)- Guddiga Agaasimayaasha Bangiga Horumarinta Afrika (AfDB) ayaa ansixiyay maalgelin dheeraad ah oo dhan 76.37 milyan oo doolar, taas oo loogu talagalay ballaarinta Barnaamijka Kaabeyaasha Waddooyinka Soomaaliya, kana mid ah mashruuca marinka istiraatiijiga ah ee Geeska Afrika ee isku xira Soomaaliya, Jabuuti iyo Itoobiya.

Maalgelintan cusub ayaa ka kooban 49.16 milyan oo doolar oo ka imanaysa Sanduuqa Horumarinta Afrika (ADF), oo ah qeybta bangiga u qaabilsan deeqaha iyo deymaha fudud, iyo 27.21 milyan oo doolar oo laga helayo Sanduuqa Taageerada Kala-guurka (Transition Support Facility – TSF), kaas oo taageera dalalka u nugul dhibaatooyinka ee ku saamoobay colaadaha.

Bangiga ayaa sheegay in barnaamijkan uu diiradda saarayo horumarinta isku xirka gaadiidka gudaha Soomaaliya iyo kan u dhexeeya dalalka deriska ah ee Geeska Afrika, si loo dhiirrigeliyo ganacsiga xuduudaha ka gudba, loona xoojiyo isdhexgalka gobolka isla markaana loo yareeyo caqabadaha ka jira waddooyinka muhiimka ah.

Agaasimaha Kaabeyaasha iyo Horumarinta Magaalooyinka ee Bangiga Horumarinta Afrika, Mike Salawou, ayaa sheegay in baahida loo qabo maalgelinta dheeraadka ah ay ka dhalatay ballaarinta baaxadda mashruuca.

“Barnaamijku wuxuu ka soo gudbay faragelinno xaddidan, wuxuuna u wareegay casriyeyn buuxda oo waddooyin ah, taas oo ay suurtageliyeen naqshado la hagaajiyay iyo ku darista qaybo cusub, sida buundooyin, qaybo waddooyin dheeraad ah, tallaabooyin fududeynaya ganacsiga, iyo kaabayaal bulsho oo lagu kordhinayo faa’iidada ay bulshadu ka helayso,” ayuu yiri Salawou.

Maalgelintan ayaa inta badan lagu casriyeyn doonaa laba waddo oo istiraatiiji ah, kuwaas oo kala ah 15 kiiloomitir oo isku xira Zeylac iyo Asha Addo ee Somaliland, iyo 22 kiiloomitir oo u dhexeeya Beledweyne iyo Kalabeyr ee Dowlad-goboleedka HirShabeelle.

Bangiga Horumarinta Afrika ayaa sidoo kale sheegay in mashruucu uusan ku koobnayn dhismaha waddooyinka oo keliya, balse uu ka mid yahay barnaamijyo horumarineed iyo adkeyn bulsho, kuwaas oo lagu wanaajinayo helitaanka adeegyada aasaasiga ah. Qorshayaashaas waxaa ka mid ah qodista ceelal-biyood, dayactirka dugsiyada waxbarashada oo loo adeegsan doono xarumo horumarinta xirfadaha, dhismaha suuqyo iyo bakhaarro kayd ah, iyo dib-u-habeynta xarumaha caafimaadka.

Bangiga ayaa xusay in barnaamijkan la ballaariyay uu door muhiim ah ka qaadan doono hagaajinta nolol-maalmeedka bulshooyinka ku nool marinnada muhiimka ah, isla markaana uu xoojin doono doorka Soomaaliya ee ganacsiga iyo isku xirka gobolka Geeska Afrika.