Shabeellaha Dhexe (Dawan) — Booliska Hirshabeelle ayaa sheegay inay degmada Mahadaay ee gobolka Shabeellaha Dhexe ku dileen laba xubnood oo lagu eedeeyay inay ka tirsanaayeen Al-Shabaab, kaddib howlgal ay ka fuliyeen Suuqa Xoolaha ee degmada.
Sida uu baahiyay Telefishinka Qaranka Soomaaliyeed (SNTV), labada nin ayaa lagu eedeeyay inay miinooyin ku aasayeen Suuqa Xoolaha, kuwaas oo la sheegay in lagu doonayay in lagu waxyeelleeyo shacabka degmada.
Taliyaha Saldhigga Booliska Mahadaay, G/le Suleymaan Cowsey, ayaa sheegay in ciidamada ay heleen xog ku saabsan miinooyinka lagu aasay suuqa, taas oo keentay inay si degdeg ah uga jawaabaan.
