Boqolaal qoys oo kaamka Naasa Hablood ku jira oo gargaar la gaarsiiyay

Hargeysa (Dawan) – Wasaaradda Dib-u-dejinta iyo Arrimaha Bani’aadannimada ee Somaliland ayaa si rasmi ah ugu gaarsiisay 400 qoys raashin iyo agabyo kala duwan, kuwaas oo deggan kaamka Naasa Hablood ee magaalada Hargeysa, sida uu baahiyay Telefishinka Somaliland.

Agaasimaha Waaxda Barakacayaasha ee Wasaaradda Dib-u-dejinta, Maxamuud Yuusuf Cali, iyo Guddoomiyaha Degmada Hargeysa, Axmed Macallin Haaruun, ayaa ka hadlay qaybinta agabkan, iyagoo xusay in mashruucani uu ka mid yahay dadaallada dowladda ee lagu taageerayo barakacayaasha ku nool kaamka Naaso Hablood.

Maxamuud Yuusuf Cali ayaa sheegay in agabkan oo isugu jira bustayaal, maacuun, baco iyo agab kale oo muhiim ah loo qaybiyay 400 qoys oo barakacayaal ah, isagoo sheegay in lasii wadi doono dadaallada lagu taageerayo qoysaska danyarta ah.

Guddoomiyaha Degmada Hargeysa, Axmed Macallin Haaruun, ayaa sheegay in mashruucan uu yahay mid muhiim ah oo u suurtagelinaya barakacayaasha inay helaan raashin iyo agabyo aasaasi ah oo daboolaya baahiyahooda nololeed.

Wasiirka Wasaaradda Dib-u-dejinta iyo Arrimaha Bani’aadannimada ee Somaliland, Saleebaan Ducaale, ayaa sheegay in wasaaraddu ay sii wadi doonto taageerada barakacayaasha, si loo xaqiijiyo inay helaan nolol ka wanaagsan tan ay hadda ku jiraan.

Hawlaha ka socda kaamka Naasa Hablood ayaa qayb ka ah qorsheyaasha dib-u-dejinta iyo taageerada barakacayaasha, iyadoo si gaar ah diiradda loo saarayo adeegyada aasaasiga ah sida caafimaadka, biyaha iyo waxbarashada.