Muqdisho (Dawan)- Ujeeddada dhabta ah ee waxbarashada iyo doorka ay ku leedahay dhismaha qaranka
Waxbarashadu waa tiir aasaasi u ah horumarka bulshada, xasilloonida iyo dhismaha qaranka. Si kastaba ha ahaatee, ujeeddada dhabta ah ee waxbarashadu kuma koobna oo keliya helitaanka aqoon, xirfad ama shahaado, balse waxay intaas usii dheer dhisidda wacyiga qaran, kobcinta masuuliyadda bulshada iyo fahamka danta guud. Waxbarashada aan qofka ku abuurrin wacyi qaran oo dhisan waxay noqonaysaa waxbarasho aan dhammaystirnayn, maadaama qofku uu sii ahaanayo mid ku xiran daacadnimo iyo aragtiyo hore, kuwaas oo salka ku haya qabyaalad, deegaanaysi ama dano gaar ah.
Waxbarashada dhabta ahi waa inay qofka siisaa aqoon uu ku shaqaysto, balse sidoo kale waa inay kobcisaa garaadkiisa, masuuliyadda uu bulshada ka saaran yahay, fahamka danta guud iyo dareenka waddaninnimo.
Marka waxbarashadu qofka siiso aqoon, balse aysan ku abuurin wacyi qaran, masuuliyad bulsho iyo faham ku salaysan danta guud, aqoontaasi waxay halis ugu jirtaa inay ku koobnaato heer qofeed. Qofku wuxuu noqon karaa mid aqoon iyo xirfad leh, balse haddii fikirkiisu weli ku xiran yahay qabyaalad, deegaanaysi ama dano gaar ah, aqoontiisa si buuxda loogama faa’iidaysan karo horumarka bulshada iyo qaranka.
Marka xaaladda Soomaaliya laga eego, fikraddani waxay si gaar ah muhiim ugu tahay jiilka maanta waxbaranaya. Soomaaliya waxay u baahan tahay jiil aan kaliya aqoon u lahayn cilmiga uu bartay, balse sidoo kale fahamsan in qaranku yahay masiirka guud ee dhammaan muwaadiniintiisa. Jiilkaasi waa inuu awood u yeeshaa inuu ka gudbo kala-qaybsanaanta ku salaysan qabiilka, deegaanka ama danaha gaarka ah, una gudbo faham ku dhisan muwaadinnimo, dastuurka iyo sharciga, caddaalad, sinnaan, wadajir iyo dhowrista danta guud. Waxbarashada dhabta ahi waa mid qofka ka caawisa inuu fahmo in qabiilku yahay xiriir bulsho, deegaankuna yahay qayb ka mid ah dalkiisa, halka qarankuna yahay hoyga iyo masiirka guud ee dhammaan bulshada. Sidaas darteed, daacadnimada ugu sarraysa ee muwaadinku waa inay ku wajahan tahay danta guud, nabadda, dhowrista sharciga iyo horumarka qaranka.
Waxaa sidaas awgeed la oran karaa jaamacad, dugsi ama nidaam waxbarasho oo soo saara dad shahaadooyin haysta, balse aan lahayn wacyi qaran, masuuliyad bulsho iyo faham ku dhisan danta guud, waxay soo saareen dad leh aqoon xirfadeed oo keliya, hase yeeshee weli ma aysan dhammaystirin hawsha ugu weyn ee waxbarashada ee ah dhisidda qof iyo jiil awood u leh inay dhisaan qarankooda.