Buundooyin iyo waddooyin laga hirgeliyay Dowlad Deegaanka Soomaalida

Jigjiga (Dawan) – Dowlad Deegaanka Soomaalida ayaa xarigga ka jartay wajiga koowaad ee mashruuc waddo oo isku xiraya deegaanno ka tirsan Gobolka Faafan, isla markaana dhagax dhigtay wajiga labaad ee mashruucaasi, kaas oo qeyb ka ah barnaamij lagu horumarinayo isku xirka waddooyinka miyiga oo uu taageerayo Bangiga Adduunka.

Munaasabadda oo Khamiistii ka dhacday degmada Qabribayax, waxaa ka qeyb galay Wasiirka Xafiiska Jidadka Deegaanka Soomaalida , Idiris Muuse Cabdi, Wasiirka Arrimaha Haweenka iyo Carruurta, Xaliimo Xasan, Wasiir Ku-xigeenka Xafiiska Madaxweynaha, Cabdirisaaq Sayid, iyo mas’uuliyiin kale oo heer deegaan iyo heer gobol ah, sida uu sheegay Xafiiska Jidadka Deegaanka Soomaalida Itoobiya.

Mas’uuliyiintu waxay si rasmi ah u daahfureen wajiga koowaad ee mashruuca waddada Qabribayax–Mula (Lot 1), kaas oo isku xiraya degmada Mula iyo deegaanka Qooraan, dherer ahaanna gaaraya 25 kiiloomitir.

Waxay sidoo kale dhagax dhigeen wajiga labaad ee mashruuca (Lot 2), kaas oo isku xiri doona Qooraan iyo Humbuq oo ka tirsan degmada Mula ee Gobolka Faafan.

Sida uu sheegay Xafiiska Jidadka Deegaanka Soomaalida, mashruuca waxaa laga fulinayaa barnaamijka Rural Connectivity Access Programme (R-CAP), oo ah mashruuc lagu ballaarinayo shabakadda waddooyinka miyiga, isla markaana lagu xoojinayo isku socodka guud ahaan Deegaanka Soomaalida.

Mas’uuliyiinta deegaanka ayaa sheegay in wajiga koowaad ee mashruuca lagu dhisay kharash dhan 91 milyan oo birr Itoobiya ah (qiyaastii $582,000). Wajiga labaad oo dhererkiisu yahay 25 kiiloomitir ayaa la filayaa inay ku baxdo in ka badan 115 milyan oo birr Itoobiya ah (qiyaastii $735,000).

Sidoo kale, waxaa xarigga laga jaray Buundada Qaaxa oo isku xirta degmooyinka Qabribayax iyo Buuladari.

Mas’uuliyiinta ayaa sheegay in buundada lagu dhisay kharash dhan 71 milyan oo birr Itoobiya ah, oo u dhiganta qiyaastii $455,000, isla markaana ay gacan ka geysan doonto fududeynta isu socodka, ganacsiga iyo helitaanka adeegyada aasaasiga ah.

Waddadan ayaa muhiim u noqon doonta bulshooyinka ku tiirsan dhaqashada xoolaha iyo ganacsiga maxalliga ah, kuwaas oo laf-dhabar u ah dhaqaalaha Deegaanka Soomaalida. Mas’uuliyiintu waxay sheegeen in isku xirka cusub uu yareyn doono waqtiga safarka, xoojin doono xiriirka magaalooyinka iyo miyiga, isla markaana fududeyn doono helitaanka suuqyada, iskuullada iyo xarumaha caafimaadka.

Sida uu sheegay Xafiiska Jidadka Deegaanka Soomaalida, mashaariicdan ayaa si weyn u horumarin doona isku socodka iyo isku xirka degmooyinka Mula iyo Qabribayax, waxayna qeyb ka yihiin dadaallo ballaaran oo lagu horumarinayo kaabeyaasha dhaqaalaha ee gobolka.