Muqdisho (Dawan)- Cabdiraxmaan Cabdishakuur Warsame ayaa ka jawaabay wararka la isla dhexmarayay ee ah inuu diiday in madaxweynihii hore Maxamed Cabdullaahi Farmaajo uu ka mid noqdo madasha mucaaradka, isagoo sheegay in Farmaajo uu yahay mucaarad balse uusan ka tirsaneyn Madasha Samatabixinta iyo Golaha Mustaqbalka Soomaaliyeed.
Cabdiraxmaan, oo ka hadlayay Miizaan Podcast, ayaa la weydiiyay sababta Farmaajo uusan uga mid ahayn madasha mucaaradka, wuxuuna sheegay in waxa ay mucaaradku doonayaan ay tahay in laga bilaabo wixii hore oo la dhiso hannaan cusub oo lagu wada shaqeyn karo.
Mar la weydiiyay eedda ah inuu diiday Farmaajo, Cabdiraxmaan si toos ah uma sheegin diidmo, balse wuxuu qiray in isaga iyo madaxweynihii hore ay jiraan kala aragti duwanaansho iyo waxyaabo hore u kala gaarey.
Wuxuu sheegay in khilaafka isaga iyo dowladdii Farmaajo uu si weyn u soo shaac baxay bishii Diseembar 2017, kadib markii ciidamo ka tirsan hay’adaha ammaanka ay weerar ku qaadeen hoygiisa Muqdisho, isla markaana la xiray, inkastoo markii dambe la sii daayay iyadoo aan dacwad lagu soo oogin.