Muqdisho, 11 Febraayo 2026 (Dawan)— Afar urur oo caalami ah oo ka shaqeeya arrimaha carruurta ayaa si rasmi ah uga dhawaaqay Soomaaliya isbahaysiga Joining Forces Alliance (JFA), tallaabadan oo loo arko mid muhiim u ah xoojinta u doodista xuquuqda carruurta iyo la dagaallanka xadgudubyada ka dhanka ah carruurta dalka oo dhan.
Isbahaysigan oo ay ku mideysan yihiin hay’adaha World Vision, Save the Children, SOS Children’s Villages, iyo Plan International, ayaa maanta si rasmi ah loogu daah-furay munaasabad ka dhacday Muqdisho, taas oo ay ka qeybgaleen mas’uuliyiin ka tirsan dowladda, hay’adaha bini’aadantinimada iyo xubno ka socday bulshada rayidka ah.
Axmed Cabdiraxmaan Cumar, Agaasimaha U doodista iyo Xiriirka Dibadda ee World Vision Soomaaliya, ayaa carrabka ku adkeeyay baahida loo qabo iskaashi mideysan.
“Ka dib sannado badan oo aan si gaar-gaar ah u shaqeynaynay, waxaan garowsannay in ay lagama maarmaan tahay in aan mideyno dadaalladeenna ku aaddan taageeridda carruurta Soomaaliyeed. Caqabadaha jira waa kuwo ka weyn inta hal hay’ad kaligeed wax ka qaban karto. Isku darka awooddeennu wuxuu noo suuragelinayaa saameyn ballaaran,” ayuu yiri.
Daah-furka isbahaysigan ayaa ku soo beegmaya xilli carruurta Soomaaliyeed ay wajahayaan caqabado waaweyn oo ay sabab u yihiin colaado daba dheeraaday, barakac, iyo saameynta isbeddelka cimilada.
