Nairobi 18 December 2025 (Dawan)- Hay’adda Waddooyinka Qaranka ee Kenya ayaa shaacisay in rakibidda Buundada Tana ay dhibaato ku keeni doonto isu socodka kwaddada Ukasi–Garissa–Modika, iyada oo xilliyada lagu sheegay inta u dhaxeysa 19–22 December iyo 29 December–15 January, gaar ahaan saacadaha maalintii, laga bilaabo 9:00 subaxnimo ilaa 3:00 galabnimo.
Guddoomiyaha ku-meel-gaarka ee KeNHA, Luka Kimeli, ayaa sheegay in shaqadan ay lama huraan u tahay dhismaha mashruuca buundada, wuxuuna bulshada ku booriyey in ay raacaan tilmaamaha taraafikada iyo booliska ee goobta.
Si kastaba ha ahaatee, go’aankan ayaa dhaliyay dhaleeceyn ka timid darawallada iyo shacabka, kuwaas oo ku eedeeyey KeNHA in aysan la tashan isticmaaleyaasha waddada, maadaama waqtiga shaqadu ku beegmayo xilliga safarka badan ee fasaxa. Darawallada ayaa soo jeediyey in qalabka culus la raro habeenkii si ay u yaraato saameynta ka dhalan karta.
