Jubbaland (Dawan) – Wasaaradda Gaashaandhigga Soomaaliya ayaa sheegtay in ugu yaraan 16 xubnood oo ka tirsan Al-Shabaab, oo ay ku jiraan laba hoggaamiye, lagu dilay, halka laba hoggaamiye oo kale lagu qabtay iyagoo nool, kadib howlgal militari oo ka dhacay gobolka Jubbada Hoose.
War-saxaafadeed ay maanta oo Arbaco ah soo saartay wasaaradda ayaa lagu sheegay in howlgalka la fuliyay waaberigii hore ee saaka, iyadoo si wadajir ah ay u fuliyeen Ciidanka Kumaandooska Danab ee Ciidanka Xoogga Dalka Soomaaliyeed iyo ciidamada amniga Dowlad-goboleedka Jubbaland.
Howlgalka ayaa lagu beegsaday fariisimo ay Al-Shabaab ku lahaayeen deegaanka Baqdaad, oo u dhow degmada Baadhaadhe ee gobolka Jubbada Hoose. Sida lagu sheegay war-saxaafadeedka, ciidamada ayaa dilay laba hoggaamiye oo sare oo ka tirsanaa Al-Shabaab iyo 14 dagaallame oo kale, halka laba hoggaamiye oo dheeraad ah lagu qabtay iyagoo nool.
