Dowladda oo sheegtay in xubno ka tirsan AS lagu dilay duqeyn ka dhacday Sh/ Hoose

Muqdisho (Dawan) – Wasaaradda Gaashaandhigga Soomaaliya ayaa sheegtay maanta oo Jimco ah in duqeyn ay si wadajir ah u fuliyeen Ciidanka Xoogga Dalka Soomaaliyeed iyo saaxiibbo caalami ah lagu dilay lix ka tirsan Al-Shabaab deegaanka Ugunji ee gobolka Shabeellaha Hoose.

War-saxaafadeed ay wasaaraddu soo saartay caawa oo Jimco ah ayay ku sheegtay in duqeynta lagu bartilmaameedsaday xubno ka tirsan Al-Shabaab oo, sida ay hadalka u dhigtay, dib isu abaabulayay si ay weerarro uga geystaan shacabka Soomaaliyeed.

Wasaaraddu waxay sheegtay in howlgalka lagu dilay lix dagaallame oo ka tirsan Al-Shabaab isla markaana lagu burburiyay hub iyo agab ay kooxdaasi adeegsanaysay.

Sida lagu sheegay war-saxaafadeedka, duqeynta ayaa lagu fuliyay iskaashi u dhexeeya Ciidanka Xoogga Dalka iyo saaxiibbo caalami ah, inkastoo aan la shaacin cidda rasmiga ah ee ka qayb qaadatay howlgalka.

Wasaaradda Gaashaandhigga iyo Taliska Ciidanka Xoogga Dalka ayaa sheegay inay sii xoojin doonaan howlgalada ka dhanka ah Al-Shabaab.

Howlgalkan ayaa ku soo aadaya xilli ciidamada Soomaaliya ay sheegeen sii wadaan gulufyo militari oo ka dhan ah Al-Shabaab gobollo ka tirsan koonfurta iyo bartamaha dalka, iyagoo taageero ka helaya saaxiibbo caalami ah.