Muqdisho (Dawan)- Dowladda Federaalka Soomaaliya ayaa shaacisay qorshe lagu dhimayo tirada ilaalada hubeysan ee la socda mas’uuliyiinta dowladda, iyadoo sheegtay in tallaabadan ay qeyb ka tahay dadaallada lagu xoojinayo nidaamka amniga iyo habsami u socodka maamulka dalka.
Qorshahan ayaa lagu soo bandhigay Shirweynaha Wadatashiga Amniga ee Dowladda Federaalka Soomaaliya iyo Dowladaha Xubnaha ka ah Federaalka oo ka furmay magaalada Muqdisho, kaas oo ay ka qeyb galeen wasiirrada amniga dowlad-goboleedyada, saraakiil sare oo ka tirsan ciidamada ammaanka iyo mas’uuliyiin kale.
Shirka ayaa diiradda lagu saaray dib-u-habeynta amniga gudaha dalka, adkeynta amniga badda iyo sidii xal waara loogu heli lahaa caqabadaha amni ee weli ka jira qeybo kamid ah Soomaaliya.
Wasiirka Amniga Gudaha, Cabdullaahi Sheekh Ismaaciil (Fartaag), oo si rasmi ah u furay shirka, ayaa sheegay in dowladda ay damacsan tahay in la yareeyo tirada ciidamada ilaalada u ah mas’uuliyiinta kala duwan, si loo helo hannaan amni oo waxtar badan.
