Muqdisho (Dawan) — Maamulka Gobolka Banaadir ayaa soo saaray amar cusub oo looga baahan yahay inay fuliyaan dhammaan ceelasha biyaha, xarumaha sifaynta biyaha iyo bixiyeyaasha adeegga biyaha ee ka hawlgala Muqdisho kaas oo ah inay maraan tijaabo qasab ah, daaweyn iyo shati-siin ka hor inta aysan adeegyada bixin.
Amarkan oo uu saxiixay Guddoomiyaha Gobolka Banaadir ahna Duqa Muqdisho, Xasan Maxamed Xuseen (Muungaab), ayaa qeexaya tallaabooyin kormeer oo adag oo looga golleeyahay in lagu yareeyo khataraha caafimaad ee ka dhalan kara biyaha aan nadiifka ahayn ee la cabo.
Sida ku cad amarka, dhammaan shirkadaha iyo xarumaha bixiya adeegyada biyaha ee Gobolka Banaadir waa inay nidaamkooda biyaha u gudbiyaan baaritaan shaybaar, qiimeyn dhanka daaweynta ah iyo kormeer tayo. Masuuliyiinta ayaa sheegay in aan shirakadaha loo oggolaan doonin inay bilaabaan ama sii waddaan hawlaheeda iyagoo aan helin shatiga tayada iyo badqabka biyaha oo sax ah.
Maamulka ayaa u magacaabay shaybaarka gobolka ee loo yaqaan “Water Som” inuu noqdo hay’adda farsamo ee hormuudka u ah tijaabinta biyaha, xaqiijinta daaweynta iyo la socodka tayada biyaha guud ahaan caasimadda.
Masuuliyiinta ayaa sheegay in amarkan loo soo saaray si loo xoojiyo ilaalinta caafimaadka dadweynaha, loona xaqiijiyo in adeegyada biyuhu ay u hoggaansamaan halbeegyada ay dejisay Hay'adda Caafimaadka Adduunka (WHO).
