Muqdisho (Dawan ) – Golaha Mustaqbalka Soomaaliyeed ayaa sheegay inay ka qeyb geli doonaan wadahadallada uu ku casuumay madaxweyne Xasan Sheekh Maxamuud oo keliya haddii la joojiyo waxa ay ku tilmaameen tallaabooyinka doorasho ee hal dhinac ah isla markaana la helo hannaan dhexdhexaadin madax-bannaan, sida lagu sheegay bayaan ay soo saareen manata ooo Talaado ah .
Golaha ayaa sheegay inuu weli u furan yahay wadahadal lagu gaaro heshiis qaran oo ku saabsan doorashooyinka, balse wuxuu xusay in wadaxaajood dhab ah uusan suurtagal noqon karin iyadoo ay socdaan tallaabooyin lagu wiiqayo wadahadallada.
Madaxweyne Xasan Sheekh ayaa dhawaan ku baaqay madal wadatashi qaran, si loo mideeyo dhinacyada siyaasadda loogana wadahadlo arrimaha doorashooyinka.
Golaha ayaa sheegay inuu “si taxaddar iyo masuuliyad leh” u soo dhoweynayo casuumaadda wadahadalka ee la qorsheeyay 10-ka May, balse wuxuu muujiyay walaac ku saabsan jawiga siyaasadeed ee guud.
Bayaanka ayaa lagu sheegay in goluhu hore uga qeyb qaatay wadahadallo xilli ay sheegeen in dowladda ay wadday tallaabooyin ay ku tilmaameen kuwo ka hor imaanaya dastuurka dalka.
