Muqdisho (Dawan) — Xafiiska Hantidhowrka Guud ee Soomaaliya ayaa maanta oo Talaado ah dalbaday inuu isagu maamulo tartanka shaqaalaha xafiiskiisa, isagoo Guddiga Qaranka ee Shaqaalaha Rayidka uga digay tallaabo kasta oo wax u dhimaysa madax-bannaanidiisa dastuuriga ah.
Bayaanka ayaa daba socda amar uu Ra’iisul Wasaare Xamsa Cabdi Barre ku faray wasaaradaha iyo hay’adaha federaalka inay xilalka agaasime-waaxeedyada ku buuxiyaan tartan furan oo ku salaysan aqoon, karti iyo mudnaan. Xamsa wuxuu Guddiga Shaqaalaha Rayidka faray inuu Xafiiska Ra’iisul Wasaaraha kala shaqeeyo hirgelinta hannaanka cusub, oo wajigiisa koowaad khuseeyo agaasime-waaxeedyada dowladda.
Hantidhowrka Guud wuxuu sheegay in xafiiskiisu yahay hay’ad dastuuri ah oo leh madax-bannaani maamul iyo mid maaliyadeed, isla markaana awoodihiisa lagu qeexay Sharciga Hantidhowrka Guud ee 2023 iyo Sharciga Maareynta Maaliyadda Guud ee 2019.
Sharciga Hantidhowrka Guud wuxuu xafiiska awood u siinayaa inuu shaqaaleysiiyo shaqaalihiisa, khubarada iyo la-taliyeyaasha, isagoo adeegsanaya hannaan tartan iyo hufnaan leh. Sharcigu wuxuu sidoo kale dhigayaa in shaqaalaha xafiiska lagu dhaqo nidaamka mushaharka dowladda iyo Sharciga Shaqaalaha Rayidka, haddii aanu sharciga gaarka ahi si kale u sheegin.
