Itoobiya (Dawan) – Ra’iisul Wasaaraha Itoobiya, Abiy Axmed, ayaa meesha ka saaray walaacyada ku saabsan isbahaysi la sheegay inuu ka dhan yahay Itoobiya oo ay sameeyeen Eritrea, Jabhadda Xoreynta Dadka Tigrayga (TPLF) iyo Suudaan, isagoo sheegay in dalku uusan wajahayn khatar ku saabsan madaxbannaanidiisa.
Abiy Axmed oo khudbad ka jeediyay Aqalka Shacabka ee Itoobiya ayaa sheegay in dowladda federaalka Itoobiya ay si firfircoon u dhisayso awooddeeda difaaca, isagoo caddeeyay in Itoobiya aysan cabsi ka qabin cid kasta oo isku dayda inay halis geliso madaxbannaanideeda.
“Ha ahaato Eritrea, TPLF ama Suudaan, xitaa haddii lagu kordhiyo dhinacyada kale, Itoobiya wax cabsi ah kama qabto madax-bannaanideeda,” ayuu yiri Abiy Axmed, isagoo ku nuuxnuuxsaday in la xoojinayo awoodda difaaca dalka.
Hadalkan Ra’iisul Wasaaraha Itoobiya ayaa yimid xilli falanqeeyayaal arrimaha gobolka ka faallooda ay soo hadal qaadeen suurtagalnimada isbahaysi istaraatiiji ah oo u dhexeeya Eritrea, TPLF iyo Suudaan, kaas oo loo arko mid caqabad ku noqon kara dowladda Addis Ababa.
