Jabuuti (Dawan)— Ra’iisul Wasaaraha Jabuuti, Cabdulqaadir Kaamil Maxamed, ayaa Arbacadii qaabilay Wasiir Ku-xigeenka Arrimaha Dibadda Yemen, Mustafa Axmed Noman, iyagoo ka wada hadlay xaaladda bani’aadannimo ee qaxootiga Yemen, xilli ay sii xoogeysanayaan dagaallada dalkaas iyo xiisadaha gobolka Badda Cas. Sida ay werisay Wakaaladda Wararka Jabuuti (ADI), kulanka ayaa diiradda lagu saaray soo dhaweynta iyo ilaalinta qaxootiga, iyo baahida loo qabo in la xoojiyo dadaallada caalamiga ah ee wax looga qabanayo dhibaatada bani’aadannimo.
Tan iyo bishii Sebteembar, qiyaastii 3,840 qof oo ka soo cararay dagaallada Yemen ayaa gaaray Jabuuti, kuwaas oo intooda badan ah haween iyo carruur. Qaar badan oo ka mid ah ayaa lagu soo dhaweeyay xerada qaxootiga ee Markazi, magaalada Obock ee waqooyiga Jabuuti, kana soo horjeedda xeebaha Yemen.
Jabuuti ayaa hore u qaabishay in ka badan 15,700 oo qaxooti Yemeni ah sannadkii 2015, markaas oo dagaalka Yemen uu si weyn u fiday, waxaana xilligaas la furay xerada Markazi.