Jabuuti, 9 Oktoobar 2025 (Dawan) — Labo qof ayaa ku dhintay, afar kalena way ku dhaawacmeen galabnimadii Arbacada, ka dib markii ay isku dhaceen gaari xamuul culus waday iyo gaari ganacsi oo ku sugnaa Wadada Koowaad ee Jabuuti, sida ay Wakaalada Wararka Jabuuti (ADI) soo warisay.
Shilka ayaa dhacay qiyaastii 3:00 duhurnimo, meel u dhow Aagga Ganacsiga Xorta ah ee Jabuuti (DPFZA). Wararka hordhaca ah ayaa sheegaya in gaari nooca Sinotruck iyo gaari nooca Dyna, ah oo labadaba u diiwaangashan Jabuuti, ay si fool-ka-fool ah iskugu dhaceen, iyadoo sababta shilka weli la baarayo.
Shaqaalaha gurmadka ayaa shilka ku tilmaamay mid aad u xoog badan, iyadoo dhaawacyada labada gaari ay ka muuqatay saameyn culus. Kooxaha degdegga ah ayaa si dhakhso leh u geeyay dadka dhaawacmay isbitaalada caasimadda.
Mas’uuliyiinta ayaa baaritaanno furay si loo ogaado sababta saxda ah ee shilka. Sidoo kale, waxay wadayaasha kula dardaarmeen in ay muujiyaan taxaddar dheeraad ah, gaar ahaan qaybta wadada ee weli dhismo ku socda, halka xawaaraha sare uu weli ka mid yahay sababaha ugu badan ee shilalka, sida ay wakaaladu ku warantay