Hargeysa (Dawan) – Madaxweynaha Somaliland, Cabdiraxmaan Maxamed Cabdillaahi (Cirro), ayaa sheegay inuusan xilligan jirin qorshe ku saabsan in Israa’iil saldhig ciidan ka samaysato Somaliland, hase yeeshee ma uusan gebi ahaanba meesha ka saari karin suuragalnimada arrintaas mustaqbalka.
Wareysi uu siiyay telefishinka i24NEWS ayaa lagu weydiiyay suuragalnimada in Israa’iil mustaqbalka saldhig ciidan ka dhisato Somaliland. Madaxweyne Cirro ayaa ku jawaabay in arrintaasi aysan hadda qorshaha ku jirin. Markii su’aasha lagu celiyay in arrintaasi dhici karto mustaqbalka, wuxuu sheegay inuusan meesha ka saari karin suuragalnimada.
"Hadda maya… meesha kama saari karo," ayuu ku soo koobay jawaabtiisa.
Hadalka Madaxweynaha ayaa dhaliyay dood ku saabsan nooca xiriir ee Somaliland iyo Israa’iil yeelan karaan sannadaha soo socda, gaar ahaan marka la eego muhiimadda istiraatiijiyadeed ee Somaliland iyo Dekedda Berbera, oo ku taalla marin-biyoodka muhiimka ah ee u dhexeeya Badda Cas iyo Gacanka Cadmeed.
