Markab Shidaal oo lagu afduubtay Gacanka Cadmeed

Gacanka Cadmeed (Dawan)— Lix qof oo hubeysan ayaa la wareegay markab shidaaal oo marayay Gacanka Cadmeed, waxaana markii dambe loo weeciyay dhanka Soomaaliya, sida ay sheegtay Hay’adda Ganacsiga Badda ee Boqortooyada Ingiriiska (UKMTO).

Dhacdadan ayaa ka dhacday meel qiyaastii 136 mayl-badeed dhanka bari kaga beegan magaalada Al Mukalla ee Yemen, xilli markabku u socday dhanka galbeed. Markabka ayaa markii hore diray baaq degdeg ah, isagoo sheegay in doon aan la aqoonsan ay kusoo dhawaatay.

UKMTO ayaa warbixin dambe ku xaqiijisay in lix qof oo hubeysan ay fuuleen markabka, lana wareegeen gacan-ku-hayntiisa, islamarkaana ay beddeleen jihadii uu ku socday, iyagoo u leexiyay dhanka Soomaaliya.

Hay’addu ma aysan shaacin cidda ka dambeysa falkaas iyo xaaladda shaqaalaha saaran markabka, balse waxay sheegtay in mas’uuliyiinta ay baaritaan ku hayaan dhacdada. Maraakiibta ku sugan ama maraysa Gacanka Cadmeed ayay sidoo kale ugu baaqday inay feejignaan dheeraad ah muujiyaan, isla markaana ay soo sheegaan dhaqdhaqaaq kasta oo looga shakiyo khatar amni.

Dhacdadan ayaa sii xoojisay walaaca laga qabo dib u soo laabashada falalka burcad-badeednimada ee Gacanka Cadmeed iyo xeebaha Soomaaliya. Bishii July, markabka shidaalka ee MT ASANA ayaa lagu qabsaday meel u dhow xeebaha Yemen, kaddibna waxaa loo kaxeeyay dhanka Soomaaliya.

Labada dhacdo ayaa qayb ka ah silsilad afduubyo iyo weerarro lagu beegsanayo maraakiibta oo soo noqnoqday tan iyo horraantii sanadkan. Warbixinno amni oo soo baxay toddobaadyadii u dambeeyay ayaa tilmaamaya in kooxaha burcad-badeedda ay awood u yeesheen inay hawlgalladooda ka fuliyaan meel ka baxsan xeebaha Soomaaliya, iyagoo ka gudbaya Gacanka Cadmeed si ay maraakiib uga qabsadaan dhinaca Yemen.