Maxaa xal loogu heli la’yahay cilladda qaboojiyeyaasha Garoonka Aadan Cadde?

Muqdisho (Dawan) – Maamulka Garoonka Aadan Cadde ee Muqdisho iyo Shirkadda FAVORI ayaa sheegay in ay ku guda jiraan xallinta cabashooyinka la xiriira qaboojiyeyaasha garoonka, kuwaas oo si aan habboonayn u shaqeynayay, taas oo sababtay inay dadka rakaabka ah la kulmaan kuleel aad u sareeya.

Mas’uuliyiinta garoonka ayaa sheegay in kuleelka uu saameyn ku yeeshay shaqooyin badan, iyadoo dad badan oo ku sugnaa garoonka ay la kulmeen dhibaatooyin. Waxay tilmaameen in arrintani ay sababtay in qaar ka mid ah howlaha garoonka ay si ku-meelgaar ah u istaagaan.

“Waxaan isla qaadanay in shirkadda FAVORI ay masuuliyad ka saaran tahay arrintan, gaar ahaan maadaama ay tahay shirkaddii adeegga bixisay,” ayuu yiri Cismaan Cali Faarax, Maareeye ku xigeenka Garoonka Aadan Cadde. Isaga oo intaas ku daray “Garoonku waa inuu noqdaa meel qabow oo dadku si habsami leh ugu isticmaali karaan.”

Shirkadda FAVORI, oo masuul ka ah adeegyada garoonka, ayaa sheegtay in qaboojiyeyaasha garoonka ay u xilsaaran tahay shirkad kale oo lagu magacaabo Shabeele Group, taas oo hawshan ka mas’uul ah ilaa Oktoobar 2025. FAVORI waxay sidoo kale ballanqaadday in 10 maalmood gudahood lagu xallin doono dhibaatada kuleelka ee ka taagan garoonka.