Soomaaliya, 15 Nofeembar 2025 - Guddiga Madaxa-bannaan ee Doorashooyinka Qaranka iyo Soohdimaha(GMDQS) ayaa maanta si rasmi ah u bilaabay qaybinta kaararka codbixinta ee degmooyinka darajada B ee Muqdisho. Hawshan, oo ka socon doonta 42 xarumood oo gobolka Banaadir ah, ayaa noqonaysa tallaabadii koowaad ee diyaar-garowga doorashada deegaanka, waxaana xigi doona qaybinta kaararka degmooyinka darajada A.
Maxay yihiin darajooyinka A iyo B?
Nidaamka A/B waa hab lagu kala saaray degmooyinka Muqdisho iyadoo lagu saleeyay tirada codbixiyeyaasha is-diiwaangeliyay. Dowladda Federaalka ayaa nidaamkan ansixisay 23-kii Oktoobar 2025, iyadoo ujeedadu tahay in matalaadda siyaasadeed lagu saleeyo xog dhab ah oo laga helo diiwaangelinta doorashada.
16 degmo oo keliya ayaa sharci ahaan lagu saleeyey nidaamka doorashada
In kasta oo Muqdisho maanta tahay 20 degmo, haddana Sharciga Doorashooyinka Qaranka ee 2024 wuxuu sharci ahaan aqoonsan yahay oo keliya 16 degmo—kuwaas oo jiray 31-kii December 1990. Degmooyinkan ayaa ah kuwa lagu fulinayo dhammaan habraacyada doorashada: diiwaangelinta codbixiyeyaasha, darajo-bixinta iyo qaybinta kuraasta golayaasha deegaanka. Degmooyinka la sameeyay wixii ka dambeeyay burburkii dowladdii dhexe lama gelin nidaamka doorashada.
Xogta 923,220 codbixiye oo saldhig u noqotay nidaamka cusub
Guddiga Doorashooyinka ayaa gobolka Banaadir ka diiwaangeliyay 923,220 codbixiye, xogtan oo si degmo-degmo ah loo kala jabiyayna waxay noqotay aasaaska darajo-bixinta cusub.
Marka xogta la eego, waxaa cad in degmooyinka darajada B loo aqoonsaday kuwa leh tirada ugu hooseysa ee is-diiwaangelinta. Shangaani, Xamar-Weyne, Cabdicasiis, Bondheere, Shibis, Xamar Jajab iyo Waaberi ayaa dhammaantood ka mid ah degmooyinka ugu yar tiradooda, kuwa qaar aan gaarin 10,000, halka kuwa kale aysan dhaafin 25,000.
