Muqdisho, 7 Febraayo 2026 (Dawan) – Ra’iisul Wasaaraha Soomaaliya, Xamsa Cabdi Barre, ayaa maanta oo Sabti ah la kulmay Ku-simaha Safiirka Dowladda Mareykanka u qaabilsan Soomaaliya, Justin Davis, iyaga oo ka wada hadlay xoojinta iskaashiga dhinaca amniga iyo sii wadista ololaha dowladda ee ka dhanka ah kooxda Al-Shabaab, sida uu sheegay xafiiska Ra’iisul Wasaaraha.
Wadahadallada ayaa diiradda lagu saaray horumarka dhowaan laga gaaray la-dagaallanka Al-Shabaab iyo dadaallada lagu xasilinayo deegaannada laga xoreeyay kooxdaas.
Ra’iisul Wasaare Xamsa ayaa Ku-simaha Safiirka Dowladda Mareykanka warbixin ka siiyay horumarka laga gaaray ololaha milatari ee ka dhanka ah Al-Shabaab, isaga oo uga mahadceliyay Dowladda Mareykanka taageerada joogtada ah ee ay siiso Soomaaliya, gaar ahaan dhinacyada tababarka iyo qalabeynta Ciidamada Qalabka Sida.
Ra’iisul Wasaaraha ayaa carabka ku adkeeyay in ka saarista kooxaha xagjirka ah gobollada istaraatiijiga ah ay tahay mudnaanta ugu sarreysa ee dowladda, isaga oo guulaha amniga ku xiray kor u qaadista wax-soo-saarka cunnada, dhiirrigelinta maalgashiga iyo soo kabashada dhaqaalaha dalka.
