Muqdisho (Dawan) — Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa sheegay in dalka laga helay macdano muhiim ah oo ay ka mid yihiin Uranium, Lithium iyo Cobalt, kuwaas oo uu sheegay inay ka mid yihiin khayraadka dabiiciga ah ee Soomaaliya leedahay.
Madaxweynaha ayaa hadalkan ka jeediyay furitaanka Madasha Maaliyadda Horumarinta Soomaaliya, oo looga hadlayay kobcinta dhaqaalaha, soo jiidashada maalgashiga iyo xoojinta ilaha dhaqaale ee dalka.
Waxa uu sheegay in Soomaaliya ay leedahay khayraad badan oo kala duwan, oo ay ku jiraan kuwa dhulka hoostiisa ku jira iyo kuwa kale sida kalluunka, xoolaha iyo beeraha, balse loo baahan yahay aqoon, maalgelin iyo iskaashi caalami ah si looga faa’iidaysto.
“Minerals-ka adduunyada maanta aad loo raadiyo, rare earth minerals-ka la yiraahdo ayaa dalkeenna laga helaa. Hadday tahay Uranium, hadday tahay Lithium, hadday tahay Cobalt iyo kuwo kale oo badan oo adduunyadu maanta aad u danaynayso ayaa la caddeeyay inay Soomaaliya ku jiraan,” ayuu yiri Madaxweyne Xasan Sheekh.
