Garoowe (Dawan) – Kusimaha Safiirka Mareykanka ee Soomaaliya, Justin Davis, ayaa maanta booqaasho ku tegay Garoowe, halkaas oo uu Madaxweynaha dowlad goboleedka Puntland, Siciid Cabdullaahi Deni, kala hadlay arrimo la xiriira amniga, maalgashiga iyo ka faa’iideysiga kheyraadka dabiiciga ah, sida ay sheegtay Madaxtooyada Puntland.
Deni, oo uu weheliyo Madaxweyne Ku-xigeenkiisa, Ilyaas Cismaan Lugatoor, ayaa wafdiga Mareykanka ku qaabilay Qasriga Madaxtooyada ee Garoowe. Wafdiga waxaa ka mid ahaa saraakiil ka tirsan AFRICOM, oo uu ku jiray Col. Shane Jones, Taliyaha Howlgallada Gaarka ah ee Mareykanka ee Afrika.
Sida lagu sheegay qoraalka Madaxtooyada Puntland, kulanka ayaa looga hadlay xaaladda amniga iyo siyaasadda guud ee Soomaaliya, gaar ahaan iskaashiga Puntland iyo Mareykanka iyo guulaha ay Puntland sheegtay inay ka gaartay dagaalka ka dhanka ah Daacish.
Labada dhinac ayaa sidoo kale ka wada hadlay xoojinta xiriirka iskaashi ee Puntland iyo Mareykanka, gaar ahaan dhinacyada amniga, maalgashiga, kalluumeysiga, macdanta iyo shidaalka, sida lagu sheegay warka ka soo baxay Madaxtooyada Puntland.
