Kismaayo (Dawan)- Shirkii Mucaaradka uga socday maalmihii lasoo dhaafay magaalada Kismaayo ayaa laga soo saaray warmurtiyeed, iyada oo madaxweynaha loogu baaqay inuu saamileyda siyaasadda isagu yeero shir wadatashi ah, si looga heshiiyo hannaanka doorashada soo socota. Halkaan hoose ka aqriso qodobadii kasoo baxay shirka.
Shirweynaha aayo-katashiga Soomaaliyeed oo ay isugu yimaadeen Golaha Mustaqbalka Soomaaliyeed, mudanayaal ka tirsan labada Gole ee Baarlamaanka Federaalka Soomaaliya, siyaasiyiin horay xilal kala duwan uga soo qabtay Dalka iyo qaar ka mid ah ururrada bulshada rayidka ah oo socday 18–20kii December 2025 ayaa diiradda lagu saaray xaaladda siyaasadeed, amni, dhaqaale iyo bani’aadannimo ee Dalka Soomaaliya.
Shirweynuhu wuxuu warbixino ka dhagaystay ka qaybgalayaasha iyo mas’uuliyiin xog-ogaal u ah xaaladda Dalka. Warbixinadaas oo ahaa kuwo walaac weyn leh ayaa caddeeyey in maamulka Madaxweyne Xasan Sheekh uu ku fashilmay siyaasaddii, amnigii iyo horumarintii Dalka, isagoo la yimid siyaasado lagu kala qaybinayo laguna kala irdheynayo shacabka Soomaaliyeed.
Shirweynuhu wuxuu isku raacay in Madaxweyne Xasan Sheekh uu beddelay Dastuurkii Dalka, afduubayna hay’adihii dastuuriga ahaa ee dheelitirka u ahaa awoodda laanta fulinta, oggolaadayna in qaar ka mid ah dowladaha xubnaha ka ah DFS ay muddo dhaaf iskaga joogaan madaxtinimada, taasoo keentay qalalaase siyaasadeed iyo mid dastuur.
Shirweynuhu wuxuu kaloo isku raacay in Madaxweynaha uu dayacay amniga Dalka, isagoo gabi ahaanba joojiyey dagaalkii lagula jiray argagixisada Al-Shabaab, ciidankii Xoogga Dalka iyo awoodda amniga Qarankana u loogay cadawga. Siyaasadda xumida Madaxweynaha iyo xukuumaddiisu waxay sababtay fashil amni, burbur ku yimid kala dambeynta, niyadda iyo caqiidada dagaal ee ciidanka, taasoo ay sabab u yihiin musuq, eex iyo ku takrifal awoodeed oo lagula kacay ciidamada.
Waxaa sidoo kale maamulka Madaxweyne Xasan Sheekh Dalka u horseeday burbur dhaqaale iyo xaalad bani’aadannimo oo ka dhalatay musuq baahsan, barakicinta danyarta, xaraashka dhulka dowladda, niyad-jebinta maalgeliyayaasha gudaha iyo dibedda, taasoo keentay in dad badan ay hantidooda Dalka kala baxaan, kuwana ay ku hanti beelaan.
Golaha Mustaqbalka Soomaaliyeed, iyagoo ka duulaya waajibaadkooda badbaadinta Dalka, midnimada iyo danta guud ee ummadda Soomaaliyeed, ayaa marka uu shirku dhammaaday kana xaajooday xaaladda Dalka ku sugan yahay iyo halista siyaasadeed, amni iyo dhaqaale, go’aansaday qodobadan soo socda:
1. In shirweynuhu uu mudnaan koowaad siinayo midnimada iyo wadajirka ummadda Soomaaliyeed, kana hortagayo wax kasta oo dhaawacaya midnimada Dalka iyo dadka.
2. In meel looga soo wada jeesto lana iska kaashado sidii Dalka looga badbaadin lahaa firaaq dastuuri ah, hubanti la’aan siyaasadeed iyo halista cadowga argagixisada ee Al-Shabaab iyo Daacish.
3. In heshiiska bulsho ee dowlad-dhiska Soomaaliya uu saldhig u yahay Dastuurka KMG ah ee 2012-kii, wax ka beddelka hal dhinac ah ee ay sameeyeen Madaxyaweynaha JFS-na uu yahay waxba kama jiraan, ujeeddadiisuna tahay mid gurracan oo lagu kala geynaayo ummadda Soomaaliyeed.
4. Shirweynuhu wuxuu hoosta ka xariiqayaa in muddo xileedka Goleyaasha Baarlamaanka uu ku egyahay 14ka April 2026, halka uu kan Madaxyaweynaha ku egyahay 15ka May 2026. Shirweynuhu marna ma aqbalayo wax muddo kordhin ah oo hay’adaha dastuuriga ah, maadaama ay abuureyso xasilooni darro siyaasadeed, firaaq dastuuri ah iyo qalalaase amni.
5. Shirweynuhu wuxuu diyaar u yahay in uu Madaxweyne Xasan Sheekh kala xaajoodo sidii Dalka loogu qaban lahaa doorasho heshiis lagu yahay, daahfuran, ka horumarsan doorashadii 2022, xoojinaysa matalaadda deegaannada iyo sharciyadda Xildhibaannada, guddiga doorashaduna uu noqdo mid heshiis lagu yahay kuna qabsoonta xilligeeda.
