Muqdisho (Dawan) – Soomaaliya ayaa soo gabagabeysay Shirweynihii 1-aad ee Badaha Soomaaliyeed, kaas oo ka dhacay magaalada Muqdisho intii u dhaxeysay 4 iyo 5 Agoosto, waxaana lagu go’aamiyay diyaarinta Istiraatiijiyadda Qaran ee Badaha Soomaaliyeed iyo dhismaha Golaha Qaranka ee Badaha si loo hago siyaasadda badda, dhaqaalaha buluugga ah iyo amniga xeebaha.
Intii uu socday shirweynaha, waxaa diiradda lagu saaray muhiimadda ay badaha Soomaaliya u leeyihiin horumarka dalka, kobcinta dhaqaalaha buluugga ah, ilaalinta deegaanka badda, amniga badaha iyo sidii looga faa’iideysan lahaa khayraadka dabiiciga ah ee ku jira xeebaha Soomaaliya.
Shirweynaha ayaa lagu tilmaamay bilowga hannaan cusub oo lagu doonayo in Soomaaliya ay ku yeelato siyaasad mideysan oo lagu hago arrimaha badaha, iyadoo la isku raacay in la sameeyo madal qaran oo sannad kasta lagu falanqeeyo danaha istiraatiijiga ah ee dalka ee la xiriira badaha, dekedaha, gaadiidka badda, ganacsiga iyo ilaalinta deegaanka badeed.
Qodobada ugu muhiimsanaa ee ka soo baxay shirweynaha waxaa ka mid ahaa diyaarinta Istiraatiijiyadda Qaran ee Badaha Soomaaliyeed, taas oo qeexi doonta himilada dalka ee dhinacyada amniga badda, dhaqaalaha buluugga ah, horumarinta dekedaha iyo gaadiidka badda, ilaalinta deegaanka badeed iyo diblomaasiyadda badaha.
Sidoo kale, waxaa lagu heshiiyay in la dhiso Golaha Qaranka ee Badaha Soomaaliyeed, kaas oo ay xubno ka noqon doonaan wasaaradaha iyo hay’adaha dowladda ee ku shaqada leh arrimaha badda. Golahaasi ayaa yeelan doona guddi farsamo oo ay hoggaaminayaan khubaro leh aqoon iyo waayo-aragnimo ku saabsan maamulka iyo horumarinta khayraadka badda.
