Muqdisho (Dawan)– Bandhigga ganacsiga ee Som Souk Expo ayaa 11 ilaa 13 Oktoobar lagu qabanayaa xaafadda Tarabuunka ee degmada Hodan, magaalada Muqdisho. Gelitaanka bandhigga waa u bilaash dadweynaha. Qabanqaabiyeyaashu waxay ku tilmaameen bandhiggii ugu horreeyay ee noociisa ah oo magaalada ka dhaca. In ka badan 200 ganacsi ayaa horay isu diiwaangeliyay, diiwaangelintuna weli way socotaa.
Bandhigga saddexda maalmood ah wuxuu hal goob isugu keenayaa ganacsatada, macaamiisha, maalgashadayaasha iyo dhallinyarada haysta fikrado ganacsi. Qabanqaabiyeyaashu waxay sheegeen inuu u furan yahay ganacsiyo noocyo kala duwan leh.
"Som Souk Expo waa bandhig carweed ay ka qaybgali karaan ganacsiyada noocyadooda kala duwan, haddii ay noqoto maqaayadaha, dadka dharka iibiya, shirkadaha waaweyn, sidoo kale bangiyada iyo jaamacadaha," ayay tiri Casho Maxamed Nuur, oo ah madaxa iibka ee Som Souk Expo.
Casho waxay sheegtay in dadweynaha soo booqda bandhigga loo diyaariyay qiimo dhimis gaar ah. Waxaa kale oo goobta lagu soo bandhigi doonaa ciyaaro dhaqameed iyo hiddo. Bandhiggu wuxuu sidoo kale ku beegan yahay Maalinta Calanka ee 12-ka Oktoobar, taas oo halkaas lagu xusi doono.
Qabanqaabiyeyaashu waxay sheegeen in ujeeddada bandhiggu aysan ahayn iib maalin keliya ah. Waxay ku tilmaameen fursad ay ganacsatadu xiriir joogto ah kula yeeshaan macaamiisha.
