Boosaaso (Dawan) – Madaxweynaha Puntland, Siciid Cabdullaahi Deni, ayaa xarigga ka jaray Garoonka Kubadda Cagta ee Shuhadada Stadium ee magaalada Boosaaso, oo ah xarun muddo dheer ay sugayeen bulshada, laguna tilmaamay mid ka mid ah mashaariicda ciyaaraha ee ugu waaweyn gobolka Bari.
Garoonkan, oo hore loogu yaqaanay Garoonka Kubadda Cagta ee Boosaaso, ayaa loo bixiyay Shuhadada Stadium si loogu xuso ciidamadii ku naf waayay dagaalladii ka dhacay buuraha Calmiskaad, halkaas oo ciidamada Puntland ay dagaal culus kula galeen kooxda Daacish, sida ay sheegeen mas’uuliyiintu.
Madaxweyne Deni ayaa sheegay in furitaanka garoonku uu yahay “habeen weyn” oo muujinaya farxadda bulshada Boosaaso, isla markaana uu astaan u yahay natiijada halgankii Calmiskaad iyo guulaha laga gaaray howlgalkaas.
Maxaa loogu magac daray Shuhadada?
Magaca Shuhadada Stadium waxaa loogu talagalay in lagu maamuuso askartii ku dhintay dagaalkii Calmiskaad, oo ahaa mid ka mid ah howl-galladii ugu xooganaa ee Puntland la gashay kooxda Daacish, kaas oo la sheegay inuu billowday dabayaaqadii sanadkii 2024.
Goormaa la dhagax dhigay?
Dhismaha garoonka waxaa si rasmi ah u dhagax dhigay Madaxweyne Deni 25-kii Janaayo 2023.