Garoowe (Dawam) - Dowlad Goboleedka Puntland iyo Indonesia ayaa ka wada hadlay amniga badda iyo dadaallada lagula dagaallamayo burcad-badeedda, xilli uu Garoowe kulan ku dhex maray ku-simaha madaxweynaha Puntland iyo safiirka Indonesia ee Soomaaliya, sida ay sheegtay Madaxtooyada Puntland.
Ku-simaha Madaxweynaha ahna Madaxweyne-ku-xigeenka Puntland, Ilyaas Cismaan Lugatoor, ayaa Axaddii xafiiskiisa ku qaabilay Safiirka Indonesia ee Soomaaliya, Witjaksono Adji, sida lagu sheegay war kasoo baxay Madaxtooyada Puntland. Kulanka ayaa diiradda lagu saaray xoojinta iskaashiga Puntland iyo Indonesia, oo ay ku jiraan dadaallada la xiriira la dagaallanka burcad-badeedda iyo xoojinta amniga badda, sida lagu sheegay bayaanka.
Indonesia ayaa Puntland ugu hambalyeysay howlgallada ka dhanka ah burcad-badeedda, iyadoo safiirku si gaar ah uga mahadceliyay badbaadinta muwaadiniin Indonesian ah iyo sida loola dhaqmay kadib markii la soo badbaadiyay, sida lagu sheegay bayaanka Madaxtooyada Puntland.
Wakaaladda wararka qaranka Indonesia, ANTARA, ayaa horey u sheegtay, iyadoo soo xiganaysa Wasaaradda Arrimaha Dibadda dalkaas, in afar muwaadin oo Indonesian ah ay ka mid ahaayeen shaqaalihii markabka MT Honour 25 ee la afduubtay. Wasaaradda Arrimaha Dibadda Indonesia ayaa 30-kii Abriil xaqiijisay in afarta muwaadin ay xaaladdoodu wanaagsan tahay xilli ay socdeen dadaallada lagu soo badbaadinayo.
