Puntland Oo Bilowday Hawlgallo Amni Oo Ballaaran.

Puntland, 4 November 2025 (Dawan) – Ciidanka Booliska dowlad goboleedka Puntland ayaa shalay ku dhowaaqay bilowga hawlgallo amni oo ka socda guud ahaan deegaannada Puntland, kuwaasoo lagu xoojinayo xasilloonida iyo ilaalinta sharciga.

War-saxaafadeed ka soo baxay Booliska Puntand ayaa lagu sheegay in hawlgalladan ay yihiin qayb yihiin qorshaha Maamulka ku dardargelinayso sugidda amniga iyo ka hortagga falalka amni-darrada.

Hawlgallada ayaa u muuqda kuwa lagu bartilmaameedsanayo hubka sharci-darrada ah, gaadiidka aan taariko lahayn ama aan diiwaan-gashaneyn, dadka isticmaala ama ganacsada maandooriyeyaasha, iyo sidoo kale dadka isku ekeysiiya ciidamada amniga, iyada oo booliska uu dadkaan si gaar ah digniin ugu diray.

“Ciidanka Booliska Puntland wuxuu caddeynayaa in tallaabo sharciga waafaqsan oo adag laga qaadi doono cid kasta oo ku kacda falal amni-darro, khatar ku ah amniga bulshada, ama carqalad ku ah hawlgallada amniga ee socda.” Ayaa lagu yiri bayaanka Booliska Puntland

Boolisku wuxuu ugu baaqay shacabka Puntland inay si dhow ula shaqeeyaan ciidamada amniga, islamarkaana ay soo wargeliyaan xogaha la xiriira falalka amni-darrada, si loo ilaaliyo xasilloonida guud ee bulshada.

Hawlgalladan ayaa imaanaya xilli maamulka Puntland uu sheegay in uu xoogga saarayo sugidda amniga iyo dhowrista kala dambeynta, iyadoo digniin culus loo diray dadka ku hawlan falalka sharci-darrada ah.