Muqdisho (Dawan)- Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, ayaa maanta Muqdisho ku qaabilay Reena Ghelani, Madaxa Hay’adda Plan International, iyagoo ka wada hadlay xaaladda bani’aadannimo ee Soomaaliya iyo sidii loo xoojin lahaa iskaashiga gurmadka.
Kulanka ayaa diiradda lagu saaray saameynta abaaraha ka jira qaybo ka mid ah dalka, saadaasha roobabka El Niño ee 2026 iyo digniinaha la xiriira khataraha musiibooyinka dabiiciga ah, oo ay ka mid tahay suurtagalnimada faafitaanka ayaxa kadib xilliga roobabka.
SoDMA ayaa sheegtay in Soomaaliya ay weli u baahan tahay taageero bani’aadannimo oo ballaaran, iyadoo Maxamuud Macallin uu ugu baaqay hay’adaha caalamiga ah iyo bahwadaagta dowladda inay sii xoojiyaan taageerada ay siiyaan dadka nugul.
Reena Ghelani ayaa sheegtay inay booqatay deegaano ay ka jiraan dhibaatooyin bani’aadannimo, oo ay ku jirto magaalada Baydhabo, halkaas oo ay ku aragtay baahiyaha ay qabaan bulshada ay saameeyeen xaaladaha adag.
