Soomaaliya iyo Mauritania oo furaya bog cusub oo iskaashi

Nouakchott (Dawan)- Wasiir-Dowlaha Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cali Maxamed Cumar (Cali Balcad), ayaa booqasho rasmi ah ku tegay Jamhuuriyadda Islaamiga ah ee Mauritania, taas oo diiradda lagu saarayo xoojinta xiriirka laba geesoodka ah iyo kobcinta iskaashiga ka dhexeeya labada dal ee ku wada jira Ururada Africa , Carabta iyo Islaamka.

Wafdiga Wasiir-Dowlaha ayaa markii uu gaaray Garoonka Caalamiga ah ee Nouakchott waxaa soo dhoweeyay Wasiirka Arrimaha Dibadda, Iskaashiga Afrika iyo Muwaadiniinta Mauritania ee Dibadda, Mudane Maxamed Saalim Ould Merzoug, iyo Danjiraha aan deggenayn ee Soomaaliya u qaabilsan Mauritania, Danjire Yuusuf Jeego.

Booqashadan ayaa noqotay tii ugu horreysay ee wafdi Soomaaliyeed oo heer wasiir ah uu si rasmi ah ugu tago magaalada Nouakchott, taas oo loo arko tallaabo cusub oo lagu xoojinayo xiriirka taariikhiga ah iyo iskaashiga sii kobcaya ee u dhexeeya Soomaaliya iyo Mauritania.

Labada dhinac ayaa diiradda saari doona sidii loo sii xoojin lahaa xiriirka diblomaasiyadeed, iskaashiga dhinacyada kala duwan iyo horumarinta danaha wadajirka ah ee labada dal, kuwaas oo ku mideysan xiriir walaaltinimo iyo iskaashi ku saleysan is-ixtiraam iyo dan wadaag.