Soomaaliya (Dawan) — Guddoomiyaha Hay’adda Maareynta Masiibooyinka Qaranka (SODMA), Maxamuud Macallin Cabdulle, ayaa shaaca ka qaaday qorshe ballaaran oo ay Soomaaliya iyo Hay’adda UNDP ku doonayaan inay ku ballaariyaan hababka casriga ah ee maalgelinta, si wax looga qabto caqabadaha isbiirsaday ee dalka ka jira.
Kulan ka dhacay magaalada Muqdisho maalintii Talaadada, ayuu Guddoomiye Maxamuud Macallin Cabdulle ku qaabilay Shoko Noda, Kaaliyaha Xoghayaha Guud ee Qaramada Midoobay, halkaas oo uu kaga warbixiyay muhiimadda ay leedahay xoojinta adkeysiga bulshada ee mustaqbalka fog.
Guddoomiyaha ayaa hoosta ka xarriiqay in booqashadan ay ku soo aaday xilli muhiim ah, maadaama Soomaaliya ay weli wajahayso dhibaatooyin isdaba-joog ah oo ka dhashay isbeddelka cimilada, barakaca, iyo cadaadiska dhaqaale.
Sida uu sheegay Guddoomiyaha SODMA, mudnaanta koowaad ee hay’addu waa dhismaha nidaamyo adag oo u adkeysan kara saameynta masiibooyinka, iyadoo isla markaana shacabka la gaarsiinayo horumar loo dhan yahay oo waara. Waxa uu caddeeyay in arrintani u baahan tahay maalgelin joogto ah oo lagu sameeyo hay’adaha qaranka iyo kuwa maxalliga ah, si dadaallada soo kabashada loogu beddelo saldhig adag oo lagu xoojinayo xasilloonida dalka.
