Soomaaliya oo 148 Muwaadin ka Soo Daadgureysay Yemen

Muqdisho, 10 December, 2025 (Dawan)- Soomaaliya ayaa Talaadadii, 9 December 2025, dib usoo celisay 148 muwaadiniin ah kuwaas oo xaalado kala duwan darteed ugu noola dalka Yemen, iyadoo tallaabadan ay ka mid tahay dadaallada joogtada ah ee dowladda Federaalka Soomaaliya ku xaqiijinayso badbaadada iyo daryeelka muwaadiniinteeda ku sugan qurbaha, gaar ahaan dalalka ay colaaduhu saameeyeen.

Howlgalkan dib-u-soo-celinta ayaa waxaa abaabulay Wasaaradda Arrimaha Dibadda iyo Iskaashiga Caalamiga ah, iyadoo lala kaashaday hay’ado caalami ah, si looga jawaabo xaaladaha degdegga ah ee bini aadantinimo.

Dowladdu waxay dhowr jeer horay uga soo celisay dalka Yemen muwaadiniin Soomaaliyeed, inkasta oo ay wali jiraan muwaadiniin Soomaaliyeed oo u tahriibay Yemen bilihi lasoo dhaafay, si ay uga sii gudbaan waddamada Khaliijka, taasoo cadeynaysa baahida loo qabo in dadaallada dib-u-soo-celinta iyo wacyigelinta lasii kordhiyo.

Dib-u-soo-celinta muwaadiniinta waxaa la socda kaalmo degdeg ah, qiimeyn caafimaad, iyo taageero dib-u-heshiisiin bulsho, si loo hubiyo in muwaadiniintu dib ugu soo laabtaan nolol ammaan ah, ayna dib ugu biiraan bulshada iyagoo caafimaad qaba, sida ay sheegeen mas'uuliyiinta dowladdu. Dowladda Soomaaliya waxay cadeysay inay sii wadi doonto qorsheyaashan, si dalka loogu soo celiyo dhammaan muwaadiniinta qurbaha ku dhibaataysan, gaar ahaan kuwa ku nool dalalka ay colaaduhu ka jiraan.