Muqdisho (Dawan)- Dowladda Federaalka Soomaaliya ayaa si rasmi ah ugu dhawaaqday Toddobaadka Ciyaaraha ee Nabadda iyo Midnimada, kaas oo lagu xusayo Maalinta Caalamiga ah ee Ciyaaraha, isla markaana diiradda lagu saarayo doorka isboortigu ku leeyahay mideynta bulshada iyo xoojinta nabadda.
Munaasabadda daahfurka waxaa shalay oo Isniin ah lagu qabtay Garoonka Koonis ee magaalada Muqdisho, halkaas oo lagu bilaabay tartamo ciyaareed oo kala duwan.
Furitaanka ayaa lagu asteeyay ciyaar kubadda cagta ah oo ay ka qeyb galeen gabdhaha, tartan baaskiil oo ay ka qeyb galeen gabdho iyo wiilal, iyo sidoo kale ciyaarta falaar tuurka.
Munaasabadda waxaa goob-joog ka ahaa Wasiirka Dhallinyarada iyo Isboortiga, Cabduqaadir Cali, Guddoomiye ku-xigeenka 1-aad ee Golaha Shacabka Baarlamaanka Federaalka Soomaaliya, Sacdiyo Yaasiin Xaaji Samatar, Madaxweynaha Xiriirka Kubadda Cagta Soomaaliyeed ahna Madaxweyne Ku-xigeenka Bariga iyo Bartamaha Afrika (CECAFA) Mudane Cali Cabdi Maxamed iyo Guddoomiyaha ku-meelgaarka ah ee Olombikada Qaranka, Muscab Sucaad Galoow.
Sacdiyo Samatar ayaa si rasmi ah u daahfurtay toddobaadka ciyaaraha iyo nabadda, iyadoo sanadkan halku-dhig looga dhigay:
"Isboortigu Waa Isku-xiraha Bulshada iyo Xalliyaha Caqabadaha Isdhexgalka."
Wasiirka Wasaaradda Dhallinyarada iyo Isboortiga ayaa sheegay in ciyaaruhu door weyn ka qaataan horumarinta bulshada, isla markaana ay muujinayaan heerka nabadeed ee ka jira caasimadda Muqdisho.
"Waxaan rabaa inaan dhahno sidoo kale kaalinta aad ka qaadanaysaan inaad la jaanqaaddaan dunida si aad u muujisaan nabadda ka jirta caasimadda Soomaaliya. Waad ku mahadsan tihiin, waana soo dhoweyneynaa," ayuu yiri wasiirku.
