Muqdisho (Dawan)- Magaalada Muqdisho ayaa maanta lagu qabtay munaasabad lagu shaaciyey dib u daahfurka nidaamka IATA-BSP, taas oo ay soo qabanqaabisay Hay’adda Duulista Rayidka Soomaaliyeed, isla markaana lagu xusay 35 sano oo xiriir iyo iskaashi ah oo u dhexeeya hay’adda iyo Ururka Caalamiga ah ee Gaadiidka Cirka ee IATA.
Nidaamkan, oo loo yaqaan *Billing and Settlement Plan*, ayaa ah hannaan caalami ah oo isku xira shirkadaha diyaaradaha iyo wakaaladaha safarka, isaga oo fududeeya iibinta tigidhada, xisaabinta dakhliga iyo isu-gudbinta lacagaha. Dib u hirgelintiisa ayaa la filayaa inay fursado cusub u abuurto wakaaladaha safarka Soomaaliyeed, gaar ahaan dhinaca iibinta tigidhada diyaaradaha caalamiga ah iyo la macaamilka shirkadaha duulimaadyada.
Wasiirka Gaadiidka iyo Duulista Hawada Soomaaliya, Maxamed Faarax, ayaa sheegay in wasaaraddu muddo dheer ka shaqaynaysay qorshaha dib loogu soo celinayo nidaamkan, isaga oo ku tilmaamay fursad wax ka tari karta kobaca dhaqaalaha iyo xiriirka Soomaaliya ay la leedahay suuqyada caalamiga ah.
Wasiirka ayaa xusay in Soomaaliya ay ka faa’iidi karto nidaamkan, dhinacyada horumarinta dhaqaalaha iyo fududeynta isku xirnaanta dalka iyo dunida inteeda kale.
