Muqdisho (Dawan) – Wasiirka Wasaaradda Hawlaha Guud, Dib-u-dhiska iyo Guriyeynta Xukuumadda Federaalka Soomaaliya, Ayuub Ismaaciil, ayaa shalay (Arbacadi) kulan la yeeshay madaxda Hay’adda Caalamiga ah ee Socdaalka (IOM) ee Soomaaliya, Manuel Marques Pereira si loo xoojiyo iskaashiga ku aaddan mashaariicda horumarinta iyo dib-u-dejinta barakacayaasha, sida uu baahiyay Telefishinka Qaranka Soomaaliyeed.
Kulanka ayaa diiradda lagu saaray sidii loo xoojin lahaa wada-shaqeynta dhinacyada horumarinta kaabayaasha dhaqaalaha, adkeynta bulshada, iyo dib-u-dejinta dadka gudaha dalka ku barakacay, iyadoo si gaar ah xoogga loo saarayo horumarinta adeegyada aasaasiga ah ee barakacayaasha.
Wasiir Ayuub ayaa sheegay in dowladda Soomaaliya ay diyaarisay dhulal loogu talagalay dib-u-dejinta barakacayaasha, kuwaas oo leh adeegyo aasaasi ah oo dhammaystiran. Waxa uu sidoo kale xusay in la qorsheynayo dhismaha xarumo lagu barto farsamooyinka gacanta, si bulshada loogu abuuro fursado shaqo iyo nolol-maalmeed.
