Soomaaliya, 01 Oktoobar 2025 (Dawan Africa) – Wasaaradda Awqaafta iyo Arrimaha Islaamka ayaa si rasmi ah u shaacisay furitaanka xilliga Xajka 1447/2026, iyadoo qiimaha rasmiga ah ee Xajka lagu dhigay $4,543.5, hoosna uga dhacay qiimihii sanadkii hore oo ahaa $4,604.
Wasiirka Awqaafta iyo Arrimaha Islaamka, Mukhtaar Roobow, ayaa qiimahan ku dhawaaqay habeenkii Talaadada intii lagu guda jiray munaasabad lagu furayay adeegga Xajka 2026 oo Muqdisho ka dhacday. Wuxuu sheegay in hoos u dhaca yar ee qiimuhu uu leeyahay muhiimad weyn, maadaama uu yareynayo culayska dhaqaale ee saaran xujeyda Soomaaliyeed.
“Qiimaha Xajka sanadkan waa $4,543.5. Marka la barbardhigo sanadkii hore, wax yar ayuu hoos uga dhacay,” ayuu yiri wasiirku.
Wasiirka ayaa intaas ku daray in adeegyada Xajka wax badan laga hagaajiyay, taas oo sababtay in Soomaaliya sanadkii hore ay kaalinta afaraad ka gasho dalalka leh adeegyada ugu wanaagsan ee Xajka, qiimaynta caalamiga ah ee Sacuudigu sameeyay.
Ra’iisul Wasaare Xamse Cabdi Barre, oo ka qayb galay ayaa sheegay in xukuumaddu ay qaaday tallaabooyin lagu horumarinayo adeegyada Xajka, kaddib cabashooyin soo jiitamayay sanado badan oo la xiriiray hoyga xujeyda, gaadiidka, tayada cuntada iyo isku-duwidda adeegyada. Wuxuu tilmaamay in isbeddelladaas ay la kulmeen caqabado iyo cadaadis, balse dowladda ay ku go’an tahay in la hirgeliyo.
Mas’uuliyiinta ayaa xusay in furitaanka xajka cusub iyo dhimista qiimaha ay qayb ka yihiin dadaallada lagu horumarinayo adeegyada diimeed, si xujeyda Soomaaliyeed ay si wanaagsan ugu gutaan waajibaadka Xajka.