Muqdisho (Dawan) – Wafdi ka socda dowladda Soomaaliya ayaa ka qeyb galay Shirka 2aad ee Madasha Magaalooyinka Afrika, kaas oo shalay si rasmi ah uga furmay magaalada Nairobi, Kenya.
Wafdigaan waxaa hoggaaminayay Wasiiru Dowlaha Wasaaradda Hawlaha Guud, Dibu-dhiska iyo Guriyeynta Xukuumadda Federaalka Soomaaliya, Siciid Maxamed Maxamuud Xeyd, iyo Danjiriha Jamhuuriyadda Federaalka Soomaaliya u fadhiya dalka Kenya, Jibriil Ibraahim Cabdulle, oo ah wakiilka joogtada ah ee Hay’adda UN Habitat.
Shirkan, oo socon doona muddo saddex maalmood ah, ayaa waxaa ka qeyb galay in ka badan 10,000 oo qof, iyadoo sidoo kale ka qeyb galay in ka badan 40 wasiir oo ka kala socda dalalka Afrika. Madasha Magaalooyinka Afrika waa kulan heer qaranadeed ah oo ay isugu yimaadaan dowladaha, ganacsatada, iyo bulshada rayidka ah, si ay uga wada hadlaan horumarinta iyo mustaqbalka magaalooyinka Afrika.
Kulanka sanadkan ayaa si gaar ah diiradda loogu saaray maareynta kororka deg-deg ah ee magaalooyinka Afrika, kobcinta maalgalshiga, xoojinta iskaashiga siyaasadeed, iyo kor u qaadidda qorsheynta magaalooyinka.
Waxaa sidoo kale si gaar ah loo tixgelinayaa sidii loo xoojin lahaa hawlgallada la xiriira arrimaha shaqada iyo qorsheynta magaalooyinka.
