Muqdisho (Dawan) — Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa sheegay in dowladda ay xoogga saarayso abuurista jawi ku habboon maalgashi, si dalka loogu soo jiito maalgelin gudaha iyo mid caalami ah.
Madaxweynaha ayaa hadalkan ka jeediyay furitaanka Madasha Maaliyadda Horumarinta Soomaaliya, isagoo sheegay in Soomaaliya ay ka gudubtay marxaladihii hore ee dib-u-dhiska, isla markaana ay hadda diiradda saarayso xoojinta horumarka iyo soo jiidashada maalgashiga.
Waxa uu sheegay in maalgashiga caalamiga ah uusan imaan karin haddii aysan jirin kalsooni ay maalgashadayaashu ku qabaan dalka, isagoo tilmaamay in dowladda ay ka shaqaynayso xoojinta hay’adaha, amniga, sharciyada iyo nidaamyada fududeynaya ganacsiga.
“Maalgashiga caalamiga ah iman maayo haddii dadka maalgashadayaasha ah ee dalka ku kalsoonaan. Dalka si lagu kalsoonaadana wuxuu leeyahay qalab iyo nidaamyo lagu cabbiro oo kalsoonida lagu abuuro,” ayuu yiri Madaxweyne Xasan Sheekh.
Madaxweynaha ayaa sheegay in dowladda ay rabto in Soomaalida dibadda ku maalgashan jirtay hantidooda ay dib ugu soo laabtaan dalka, isagoo xusay in 30-kii sano ee la soo dhaafay ay dad badan hantidooda dibadda u qaateen sababo la xiriira xaaladihii dalka soo maray.
