Soomaaliya oo taageertay mowqifka Shiinaha ee Taiwan

Muqdisho (Dawan) – Soomaaliya ayaa markale xaqiijisay taageeradeeda mabda’a Hal Shiinaha kadib kulan uu Madaxweyne Xasan Sheekh Maxamuud kula yeeshay Villa Soomaaliya Safiirka Jamhuuriyadda Shacabka Shiinaha ee Soomaaliya, Wang Yu.

Sida lagu sheegay qoraal ay Madaxtooyada Soomaaliya ku baahisay barta X Arbacadii, labada dhinac ayaa ka wadahadlay arrimo ay ka mid yihiin xiriirka laba geesoodka ah, iskaashiga horumarinta iyo xoojinta xiriirka diblomaasiyadeed ee Soomaaliya iyo Shiinaha.

Madaxtooyadu waxay sheegtay in Soomaaliya ay kulanka ku xaqiijisay taageeradeeda mabda’a Hal Shiinaha, iyadoo aqoonsan Jamhuuriyadda Shacabka Shiinaha inay tahay dowladda keliya ee sharci ahaan matasha Shiinaha, isla markaana ay kasoo horjeeddo nooc kasta oo madax-bannaani ah oo Taiwan sheegato.

“Mowqifka Soomaaliya wuxuu waafaqsan yahay mabda’a Hal Shiinaha,” ayaa lagu yiri bayaanka Madaxtooyada.

Madaxweyne Xasan Sheekh ayaa sidoo kale uga mahadceliyay dowladda Shiinaha taageerada joogtada ah ee ay siiso Soomaaliya, gaar ahaan dhinacyada dhismaha hay’adaha dowladda, horumarinta iyo taageerada ay Beijing u muujiso madax-bannaanida, wadajirka iyo midnimada dhuleed ee Soomaaliya, sida lagu sheegay qoraalka Madaxtooyada.

Shiinaha ayaa kamid ah saaxiibbada ugu waaweyn ee Soomaaliya ee dhinacyada horumarinta iyo kaabeyaasha dhaqaalaha, isagoo sanadihii la soo dhaafay taageeray mashaariic la xiriira waddooyinka, xarumaha dowladda, caafimaadka iyo waxbarashada.

Kulankan ayaa sidoo kale kusoo aadaya maalmo kadib markii Taiwan ay hambalyo u dirtay Somaliland munaasabadda 18-ka May, oo Somaliland u dabaaldegtay sanad-guuradii ku dhawaaqistii gooni-isu-taagga ay sheegatay inay uga go'iday Soomaaliya sanadkii 1991.

Taiwan iyo Somaliland ayaa sanadihii u dambeeyay yeeshay xiriir diblomaasiyadeed oo aan si rasmi ah u aqoonsaneyn Qaramada Midoobay, iyadoo labada dhinac ay xafiisyo wakiillo ah ka kala furteen Taipei iyo Hargeysa.

Soomaaliya ayaa kamid ah dalalka Afrika ee si joogto ah u taageera mabda’a Hal Shiinaha, iyadoo Dowladda Federaalka ay taageerto mowqifka Beijing ee ah in Taiwan ay tahay qayb ka mid ah Shiinaha, isla markaana ay xiriirka diblomaasiyadeed la leedahay Beijing oo keliya.

Bishii April ee sanadkan, Dowladda Federaalka Soomaaliya ayaa ku dhawaaqday in baasaboorrada iyo dukumentiyada safarka ee ay bixiso Taiwan aan lagu geli karin, lagagana bixi karin ama lagu sii mari karin Soomaaliya, iyadoo sheegtay in go’aankaasi waafaqsan yahay mabda’a Hal Shiinaha iyo ilaalinta madax-bannaanida dalka.

Taiwan iyo Shiinaha ayaa muddo dheer isku khilaafsanaa xaaladda jasiiradda. Beijing waxay Taiwan u aragtaa qayb ka mid ah dhulkeeda, halka Taiwan ay ku dooddo inay si madax-bannaan isu maamusho.