Wejiga koowaad ee gurmadka abaaraha oo Waqooyi Bari laga bilaabay

Soomaaliya, 18 Feebaraayo 2026 (Dawan)— Madaxweynaha Dawlad Goboleedka Waqooyi Bari ee Soomaaliya, Cabdulqaadir Firdhiye, ayaa maanta si rasmi ah u bilaabay wejigii koowaad ee barnaamijka muhiimka ah ee gargaarka bini’aadantinimo iyo biyo dhaaminta, kaas oo loogu talagalay in lagu taageero xoolo-dhaqatada iyo bulshada miyiga ah ee wajahaysa saameynta sii xumaanaysa ee abaarta iyo isbedelka cimilada

Munaasabadda furitaanka ayaa ka dhacday xarunta maamulka, waxaana ka qaybgalay wasiirro, xildhibaano, iyo masuuliyiin kale oo ka tirsan maamulka, kuwaas oo si wadajir ah u daah-furay qorshaha gargaarka degdegga ah.

Barnaamijkan ayaa hiigssnaya dhul ballaaran oo ka bilaabma Buuhoodle, kuna fidaya Ceelanyo, isagoo la filayo inuu gaaro kumanaan qoys oo abaartu saameysay.

Firdhiye ayaa sheegay in gargaarkani uu diiradda saarayo degmooyinka ugu nugul, isagoo tilmaamay in hawlgalkan uu ka kooban yahay qeybinta biyaha nadiifka ah, cuntada, daaweynta caafimaadka, iyo taageerooyin kale oo lagama maarmaan u ah bulshada xoolo-dhaqatada ah.

Madaxweynaha ayaa xusay in wejigan hore uu yahay bilowga qorshe dheer oo maamulku uu ka fulinayo gobolka si loo yareeyo saameynta abaarta, loogana hortago barakaca iyo dhibaatooyinka bini’aadantinimo. “Faragelintani waxay sii socon doontaa ilaa xaaladda bini’aadantinimo ay xasisho. Abaartu waxay dharbaaxo weyn ku dhuftay dadkayaga iyo noloshooda, waxaana nago’an inaan gargaar degdeg ah u fidinno kuwa ugu baahida badan,” ayuu yiri Firdhiye, isagoo ku booriyay bulshada iyo hay’adaha samafalka inay gacan ka geystaan howlgalka gargaarka.

Maamulka Waqooyi Bari ayaa sidoo kale qorsheynaya in wejiyada xiga ee gargaarka la ballaariyo, iyadoo la kordhinayo qaybinta cuntada, biyaha, iyo adeegyada caafimaadka, si loo daboolo baahiyaha sii kordhaya ee ku saabsan xoolo-dhaqatada iyo bulshooyinka miyiga ah ee gobolka.