Jabuuti (Dawan) – Xiriirka Ciyaaraha Miiska ee Jabuuti (FDJTT) ayaa soo gabagabeeyay xilli ciyaareedka 2025-2026, kaddib markii uu qabtay munaasabad abaalmarinno lagu guddoonsiinayay ciyaartoyda iyo kooxihii ugu fiicnaa dalka.
Munaasabadda oo lagu xusay guulihii laga gaaray xilli ciyaareedka, waxaa ka qeyb galay Taliyaha Ilaalada Xeebaha Jabuuti, Koloneel Waceys Cumar Boqore; Madaxweynaha Xiriirka Ciyaaraha Miiska ee Jabuuti, Maxamuud Cumar; Xoghayaha Guud ee xiriirka, Maxamed Seugeh; Agaasimaha Ciyaaraha ee Wasaaradda Ciyaaraha, iyo wakiillo ka socday xiriirrada ciyaaraha, tababarayaal, la-hawlgalayaal iyo qoysaska ciyaartoyda.
Tartamada kooxaha, kooxda Garde-Côtes ayaa ku guuleysatay kaalinta koowaad, kaddib markii ay ka adkaatay kooxaha Gendarmerie, Jaamacadda EMD iyo Ambouli.
Dhanka tartamada shaqsiga ah, Burhaan Cabdirisaaq ayaa ku guuleystay horyaalka ragga ee darajada koowaad, isagoo ka sarre maray Maxamed Houmed iyo Jamaal. Qaybta dumarka, Sareedo Maxamuud ayaa heshay kaalinta koowaad, iyadoo ka horreysay Nassima Maxamuud iyo Asma Ismaaciïl.
