Istanbul (Dawan)– Kooxda Aston Villa ayaa soo afjartay 30 sano oo ay sugeysay hanashada koob weyn, kadib markii ay 3–0 si awood leh uga adkaatay Freiburg finalka tartanka Europa League xilli ciyaareedka 2025–26.
Kooxda uu hoggaamiyo tababare Unai Emery ayaa tan iyo bilowgii tartanka loo arkayay kooxda ugu cadcad koobka, waxayna finalka gaartay iyadoo kalsooni sare leh kadib markii ay sidoo kale xaqiijisay inay ku dhameysato shanta koox ee ugu sarreeya horyaalka Premier League.
Aston Villa ayaa si weyn u maamuleysay qeybtii hore ee ciyaarta, iyadoo cadaadis joogto ah saartay difaaca Freiburg. Daqiiqaddii 41-aad ayuu Youri Tielemans dhaliyay goolka furitaanka kadib karoos uu u soo qaaday Morgan Rogers, taas oo Aston Villa u sahashay inay hoggaanka qabato.
Wax yar kadib, Emiliano Buendía ayaa sii dheereeyay hoggaanka kooxda, isagoo dhaliyay gool qurux badan waqtigii dheeriga ahaa ee qeybta hore, waxaana nasashada la aaday iyadoo Aston Villa 2–0 ku hoggaamineyso ciyaarta.
