Kuwait (Dawan) – Garsooraha caalamiga ah ee Soomaaliyeed, Cumar Cabdulqaadir Cartan, ayaa maamuli doona kulanka ugu dambeeya ee horyaalka Kuwait ee u dhexeeya kooxaha Kuwait SC iyo Al-Qadsiya, kaas oo la ciyaari doono 29-ka bishan, sida uu shaaciyay Xiriirka Kubadda Cagta Kuwait.
Sida lagu sheegay bogga rasmiga ah ee xiriirka, magacaabista Cartan ayaa timid kadib is-afgarad dhex maray Xiriirada Kubadda Cagta ee Kuwait iyo Soomaaliya, iyadoo tallaabadan lagu tilmaamay mid xoojinaysa xiriirka labada dhinac iyo iskaashiga horumarinta garsoorka kubadda cagta.
Xiriirka Kubadda Cagta Kuwait ayaa sheegay in Cumar Cartan, oo 34 jir ah isla markaana ku guuleystay abaalmarinta Garsooraha ugu Fiican Afrika ee sannadka 2025, uu ka mid yahay garsoorayaasha ugu magaca weyn qaaradda Afrika.
Cartan ayaa la filayay inuu noqdo garsoorihii ugu horreeyay ee Soomaali ah ee dhex dhexaadiya ciyaaraha Koobka Adduunka 2026, hase yeeshee waxaa laga hor istaagay inuu galo Mareykanka oo martigelinaya tartanka, inkastoo uu helay fiisaha safarka.